المكان: خرابة في الحي الخمسين… مصر.
الزمان:2901 ميلاديًا.
كنت ماشي كعادتي كل يوم وسط الخرابات عشان ادور على أي حاجة تتاكل، ووسط ما انا بقلب في النفايات لقيت حتة حديدة!
مسكتها وفضلت امسح التراب من عليها لحد ما ظهر قدامي كائن هولوجرامي شبه الأنسان بالظبط!
فركت عينيا وبصيتله وانا لسه مبرق..
-انت مين وطلعتلي من حتة الحديدة دي ازاي؟!
-انا ههولوجرام لبروفايل شخص من الواقع الافتراضي.. الميتا، طلعت من التليفون المحمول او الموبايل ده، صاحبي عملني في اواخر سنة 2022.. ومات سنة.. سنة.. مش فاكر، بس المهم إن انا موجود وطلعت من الموبايل.
-موبايل!.. وافتراضي وميتا!.. انت المسيخ الدجال؟!
-دجال ايه ياروش.. بقولك انا هولوجرام لشخص كان موجود، وبعدين مسيخ ايه بس، ده انا كنت تريند… من المشاهير يعني.
-من المشاهير سنة 2022!.. يعني أكيد عيشت الفترة اللي قبل الحرب النووية، اصل سنة 2030 قامت حرب نووية وانا من احفاد الناس اللي استخبوا جوة المخابئ، وادينا اهو بنحاول نلقط رزقنا وسط الفوضى بعد ما الأرض بقت عبارة عن خرابات.. لكن قولي يا عم التريند، انت كنت مشهور بإيه، صممت نموذج من نماذج الأسلحة اللي دمرتنا، ولا كنت شغال على سلاح ردع وفشل؟
-ردع وحرب نووية!.. ايه الحرب النووية والردع دول ياغالي؟
-اصلًا!.. طب قولي ياخال الله يباركلك، انت كنت مشهور بإيه؟!
-طبعًا اقولك.. انا مشترك في جروبات مهمة جدًا، اكبرها مجموعة محبين أنتش واجري، وكمان تيك توكر.. حتى بص.. إتي إتي إتي مونتو.. اتشنتن ماي هورتي… انتش واجري انتش واجري…
-ششششش… بس الله يخربيتك، ده إن ماكنش اتخرب اساسًا، ايه اللي انت بتتنيل تقوله ده؟!.. اللهي تتنتش من قدامي مايظهرلك صاحب.
-ايه.. بعملك تيك توك.
-بتعملي ايه ياجدع انت.. ماتحترم نفسك واقف مظبوط، ثم ايه اللي انت بتقوله ده، خوارزمية ولا معادلة ولا نيلة ايه دي؟!
-لا الحقيقة مش عارف، بس ده الترند اللي لقيته اول ما اتوجدت.
-اه.. اي كلام يعني، طب ولما هو أي كلام، بتقوله ليه، وعمومًا مش ده موضوعنا، ممكن تقولي ايه أشهر المقولات اللي انت فاكرها من سنة 2022؟
-اه طبعًا.. الست مُلزمة ولا مش مُلزمة.
-اللي هو ازاي؟!.. مُلزمة بإيه يعني او مش مُلزمة بإيه؟
-مُلزمة تحضر اللانش بوكس ولا لأ؟
-لانش ايه؟؟؟.. يااعم انت بقولك ايه الله يباركلك، هو ده كان الكلام المتداول وقتها؟!
-ايوه طبعًا.
-ايوه طبعًا؟!.. اومال فين الاديان والثقافة والعلوم والفنون اللي جدودي كانوا بيقولوا انها موجودة؟!
-الأديان بتقيد الحريات، والثقافة هي أن تجلس بجانبها في الشرفة وبجانبك كتاب للأستاذة أمل دُنقل في وقت الغروب وبجانبكم صوت فيروز، والعلوم مادة صعبة خالث، والفنون ده معهد كل اللي فيه مش لاقين شُغل.. ده ملخص عن الكلام اللي انت سألت عنه، الملخص ده جيبتهولك من بوستات عالفيس بوك.. بس سيبك من ده كله، هغنيلك الاغنية اللي طالعة تريند السنة دي.. بلعب البخت.. سألتها ورفضتني.. استغربتها اومال فين هيبتي.. حبيبي انا بضحك على خيبتي.
-اخيرًا قولت حاجة صح.
-مش فاهم؟!
-خيبتك.. دي الحاجة الوحيدة اللي صح، واما البخت بقى فعلى رأي جدي، هقوم العبه في وش أمك بعد اللي قولتهولي ده كله.
-طب ليه كده ياشبح؟!
-شبح!.. انا برضه اللي شبح!، انا اللي سيبت العالم من حواليا بيتقدم وبيصنع في قنابل نووية وأسلحة بيولوچية وكيميائية وقعدت اعمل تيك توكر وإتي إتي إتي مونتو وانتش واجري والعب البخت؟.. إن كان في حد شبح يبقى انت وكل اللي كانوا عايشين في الوقت اللي كنت عايش فيه، منكوا لله انتوا السبب، انتوا اللي رجعتونا لورا وخلتونا نرجع ونرجع والعالم كله بيتقدم لحد ما وقعنا في الرجلين وماقدرناش حتى نحمي نفسنا، ولولا الملاجئ اللي جدودي الغلابة عملوها لما اقتنعوا بفكرة الحرب، كان زماني ماجيتش اساسًا.. بس اقولك على حاجة، والله العظيم احسن حاجة اللي اتعمل فيكوا ده، النووي كان أنسب حل للقضاء على أمثالك، انت اللي زيك مكانه مش هنا… مش في الخرابة اللي بنقي منها الزرع اللي بيطلع كل فين فين، انت مكانك في قاع المستنقع اللي هناك ده.
-لا داعي للسقوط في المستنقع، فالقاع قد امتلأ بالأندال يازميلي.
-حلو ده.. وانا بقى ناوي ازيد عليهم واحد.. يلا يازميلي.
خدت حتة الحديدة او التليفون المحمول الأثري ده ورميته بعييد.. بالتحديد عند المستنقع اللي مليان مايه ملوثة، بعد كده كملت تدوير على أكل وانا بلعن في سري كل تاريخ أجدادي لأنه كان السبب في اللي انا وصلتله النهاردة.
تمت
(فهمت حاجة؟!)
